Kryetari i Kuvendit të Komunës,  z. Faruk Spahija, ua uron të gjithë mësimdhënësve dhe institucioneve arsimore të komunës 7 Marsin-Ditën e Mësuesit.

Në urimin e kryetarit Spahija thuhet: “Me rastin e shënimit të  përvjetorit të gjashtë në liri, kam nderin që të gjithë mësimdhënësve dhe institucioneve të arsimit të komunës t’ua urojë Ditën e Shkollës Kombëtare dhe të ju dëshirojë suksese edhe më të mëdha në arsimimin dhe edukimin e brezave të ri.

Është i mirënjohur kontributi dhe sakrifica e gjeneratave të tëra të punonjësve të arsimit të Kosovës për mbajtjen gjallë të arsimit shqip. Për këtë dhe punën vetëmohuese, sidomos në dekadën para luftës së fundit, ju të dashur mësimdhënës meritoni çdo respekt dhe kujdes të posaqëm të shoqërisë dhe të institucioneve tona demokratike që po i n dërtojmë, sepse pa juve dhe mundin tuaj, Kosova nuk do të ishte ajo që është sot.

Siç jeni në dijeni, institucionet demokratike të vendit, edhepse në kushte dhe rrethana të vështira veprimi, për shkak pasojave të luftës dhe të okupimit shumëvjeçar nga pushtuesi serb, janë duke bërë çmos për të krijuar kushte më të mira për shkollimin e brezave të ri dhe për  punën tuaj të shenjtë, duke nënkuptuar këtu edhe kushtet për një jetë normale e të pabrenga për juve. Jam i bindur, se me përkrahjen dhe mbështetjen tuaj, kjo do të arrihet.

Duke ju dëshiruar suksese edhe më të mëdha në misionin tuaj kombëtarë shumë human, edhe njëherë ju përgëzojë për punën tuaj vetëmohuese që po bëni dhe ju dëshirojë që të shënoni në paqe e lumturi edhe shumë  7 marse të tjera”. (ZMP)