Në përcjelljen e policëve të SHPK-së atyre shqiptarë dhe serbë, qytetarë të shumtë serbë kanë vizituar varrezat e tyre në lokacione të ndryshme të Kosovës, përfshirë këtu edhe varrezat në jug të Mitrovicës, njoftuan të hënën burimet e policisë në Mitrovicë.

Larry Miller, zëdhënës i SHPK-së për rajonin e Mitrovicës, bëri të ditur se ditën e shtunë gjithsejt trembëdhjetë konvoje sollën përafërsisht 785 vizitorë serb në varreza, në disa lokacione të Kosovës, në përcjellje të policëve shqiptarë të SHPK-ës nga Njësitë Rajonale të Trafikut nga rajonet e Prishtinës, Pejës dhe Mitrovicës.

Sipas tij, për përcjellejn e këtyre konvojeve është siguruar mbështetje edhe nga Njësitë Speciale të Policisë së Jordanisë, Pakistanit, Polonisë dhe Rumanisë, vizitat kanë qenë shumë të suksesshme dhe kanë përfunduar pa incidente.

Miller, gjithashtu njoftoi se një operacion i veçantë, nga Stacioni Verior i Mitrovicës, ua mundësoi rreth 300 qytetarëve serbë të vizitojnë Varrezat Ortodokse në jug të Mitrovicës.

“Përcjellja është siguruar nga 10 policë serbë të SHPK-ës nga Njësia Rajonale për Mbështetje Operacionale dhe ka përfunduar pa incidente. Qytetarët e Kosovës duhet të jenë shumë krenar me efektshmërinë e policëve të tyre, shqiptarë edhe serbë, të cilët kanë kryer detyrën me nderë në këto përcjellje”, tha Miller. (ZMP)