Shiu që ka rënë gjatë ditëve të vikendit në komunën e Mitrovicës, ka bërë që lumi Sitnica të dal nga shtrati i vet, me ç’rast në lagjen “2 Korriku”, janë vërshuar disa shtëpi, kështu që është rrezikuar jeta e qytetarëve dhe janë shkaktuar dëme të konsiderueshme, si dhe janë vërshuar qindra hektarë tokë buke përgjatë shtratit të lumit.

Në lagjen “2 Korriku” janë rrezikuar 14 familje me 120 anëtarë, shtëpitë e të cilave janë vërshuar plotësisht nga uji i lumit Sitnica. Kjo gjendje e krijuar ka bërë që Drejtoria për Mbrojtje Civile dhe Gatishmëri Emergjente (DMCGE) të mobilizohet me tërë kapacitetin e saj për të evituar pasojat e vërshimeve.

Gjatë natës kjo drejtori ka mobilizuar ekipin e kërkim shëptimit të Brigadës së Zjarrfikësve, me ç’rast janë evakuar të gjitha familjet e rrezikuara. Të gjitha familjet e evakuara janë vendosur tek të afërmit apo fqinjët e tyre, ndërkohë që DMCGE po bënë përpjekje, në bashkëpunim me UNHCR-in,  Kryqin e Kuq dhe organizatat tjera humanitare të sigurojë ndihma në ushqim dhe veshëmbathje.

Ekipet e DMCGE janë duke i vazhduar aktivitetet për evitimin e pasojave tjera të vërshimit, si dhe janë duke bërë vlerësimin e dëmeve të shkaktuara, ndërkohë që niveli i ujit është duke rënë, gjë që po e ndihmon aktivitetin e ekipeve të DMCGE-së.

Reshjet e fundit të shiut dhe borës kanë shkaktuar edhe pengesa në qarkullim në disa rrugë rurale të komunës. Gjendja më e vështirë është është paraqitur në disa rrugë të fshatrave të Shalës së Bajgorës, kështu që fshatrat Selac dhe Vllahi kanë mbetur të bllokuara për shkak të mbylljes së rrugëve nga ortiqet e borës.

DMCGE, në bashkëpunim me Zonën e IV të TMK-së kanë ndërmarrë masa gjatë ditës së sotme për zhbllokimin e rrugës për në Vllahi, ndërsa rruga për në Selac pritet të zhbllokohet më vonë.

Familjet e vërshuara nga lumi i Sitnicës sot i ka vizituar, nënkryetari i Kuvendit të Komunës, Mursel Ibrahimi. (ZMP)