Kryetari i Kuvendit të Komunës, Faruk Spahija, ka shprehur keqardhje dhe indinjatë për ngritjen e aktakuzës nga Gjykata e Hagës kundër kryeministrit të Kosovës, Ramush Haradinaj. Kryetari Spahija  e çmon lartë sjelljen dhe veprimet e kryeministrit Haradinaj  pas marrjes së aktakuzës, me të cilat tregoi se mbi të gjitha është i interesuar për  pavarësinë sa më të shpejtë të Kosovës, si dhe qëndrimin e tij të denjë dhe konstruktiv për të bashkëpunuar me Gjykatën e Hagës.

Poashtu, kryetari Spahija çmon lartë kontributin dhe sakrificën e Ramush Haradinajt, para, gjatë dhe pas luftës, për lirinë e plotë të Kosovës dhe të mirën e popullit.

Kryetari i Kuvendit të Komunës, Faruk Spahija ka konsideratë të madhe dhe i shpreh mirënjohje z Haradinaj për intersimin dhe angazhimin e tij si kryeministër i Kosovës për  zgjidhjen e problemeve të qytetarëve të komunës së Mitrovicës dhe integrimin sa më të shpejtë të qytetit.

Në fund, kryetari i Kuvendit të Komunës, Faruk Spahija, apelon tek qytetarët e komunës që të jenë vigjilent dhe të kujdesshëm, në mënyrë që të mos lejojnë askë që të shfytëzojë situatën e rëndë në komunë për të realizuar qëllime që nuk janë në përputhje me synimet dhe aspiratat e qytetarëve të komunës dhe të vendit.

Kryetari Spahija vlerëson se sjellja  dinjitoze dhe e përgjegjshme e qytetarëve të komunës në këto momente, do të ishte një mbështetje e fuqishme ndaj kërkesës së vetë z. Haradinaj dhe udhëheqësve të institucioneve kryesore të vendit e të subjekteve politike,  për të ruajtur rendin dhe qetësinë, në mënyrë që institucionet demokratike të vendit të vazhdojnë me përmbushjen e obligimeve të tyre drejtë njohjes së pavarësisë së vendit. (ZMP)