Si pasojë e prishjeve në stacionin shpërndarës të rrymës në Vallaq të Zveçanit, është çrregulluar funksionimi normal i disa veprimtarive në komunë. Kështu, i tërë qyteti gjatë natës dhe deri në orët e pasditës nuk ka pas furnizim me ujë të pijshëm, sepse edhe në fabrikën për prodhimin e ujit ka patur mungesë të rrymës elektrike.

Në disa shkolla të qytetit, si pasojë e mungesës së rrymës elektrike dhe e derivateve të naftës është çrregulluar procesi i mësimit në tri ditët e fundit. Mësimi në shkollat fillore “Eqrem Qabej”, “Nonda Bulka” dhe “Aziz Sylejmani” që zhvillohet në të njejtën ndërtesë, të martën dhe të mërkurën është mbajtur me orar të reduktuar, ndërkaq që gjatë ditës së enjtë nuk është mbajtur fare mësimi, për shkak se nuk ka patur ngrohje, si pasojë e mungesës së derivateve të naftës.

Mësimi është çrregulluar edhe në shkollën fillore në fshatin Selac të Shalës së Bajgorës, por jo si pasojë e mungesës së rrymës dhe derivateve të naftës. Mësimi në këtë shkollë është çrregulluar për shkak të bllokimit të rrugës nga ortiqet e borës, për ç’arsye arsimtarët që mbajnë mësim atje nuk kanë mundur të udhëtojnë.

Mungesa e energjisë elektrike dhe derivateve të naftës ka shkaktuar probleme gjatë ditës së enjtë edhe në funksionimin e veprimtarive të administratës komunale.

Çrregullimi në funksionimin e veprimtarive të lartëpërmendura, si pasojë e derivateve të naftës është bërë për shkak se kompania “Tricom”, e cila ka fituar tenderin për furnizim të të gjitha institucioneve të vendit që e ka shpallur Zyra e Prokurimit Qëndror, nuk i ka përmbushur obligimet e veta me kohë dhe në mënyrë të rregulltë, edhepse është njoftuar nga organet përkatëse të institucioneve lokale për mungesë të derivateve të naftës.

Prishjet në stabilimentet e stacionit shpërndarës në Vallaq, që janë shkaktuar gati para dy ditësh, kanë shkaktuar probleme edhe te kosumatorët, sepse disa nga lagjet e qytetit dhe të rrethinës furnizohen me orar të reduktuar, dy orë me rrymë dhe katër orë pa rrymë, kurse disa të tjera kanë orar edhe më të çrregulluar të furnizimit me energji elektrike. (ZMP)