Pres qendra e BSHVL-së në Mitrovicë  ka njoftuar të enjtën se në kuadër të ndryshimeve të mënyrave të reja vepruese të sigurisë, të bëra nga Brigada Shumëkombëshe Veri - Lindje, ushtarët danez të KFOR-it, që janë të  vendosur  në pjesën perëndimore të Mitrovicës, gjatë ditëve të ardhshme do të përqëndrohen në trekëndëshin Vinarc – Mitrovicë – Zveçan.

Njoftohet se këta ushtarë do të kryejnë në të njejtën kohë edhe patrullime në këtë zonë të re, e që do të thotë se do të jenë më të pranishëm dhe më të dukshëm.

Koloneli Petersen, komandant i Batalonit Danez, lidhur me këtë thotë se ushtarët e tij do të vazhdojnë të kryejnë detyrën e vet të sigurisë në rrethinë dhe në vet qytetin e Mitrovicës.

“Ne do të jemi edhe më afër banorëve, më të pranishëm nëpër rrugët e Mitrovicës dhe të gatshëm për të intervenuar në rast nevoje. Do të veprojmë me qëllim të krijimit të mardhënieve të mira në mesin e banorëve që gjenden në zonën tonë të re të përgjegjësisë”, thotë koloneli Petersen.

Për Brigadën Shumëkombëshe Veri-Lindje, ky dispozitiv i ri tregon vullnetin e vazhdueshëm, ripërtëritjen e formës për sigurimin e një mjedisi të sigurtë dhe harmonik për qytetarët e Kosovës, thuhet në komunikatën e pres qendrës së BSHVL-së. (ZMP)