Kryetari i Kuvendit të Komunës, Faruk Spahija, ka marrë pjesë në tubimin e banorëve të Suhadollit, në të cilin u shqyrtua situata e krijuar pas incidentit të shkaktuar të mërkurën nga ekstremistët serbë. Në takim ishin të pranishëm edhe nënkoloneli, Ergin Mediq, komandant rajonal i SHPK-së dhe përfaqësuesit e batalionit danez të KFOR-it.

Banorët e Suhadollit edhe një herë folën për të gjitha të këqijat që ekstremistët serbë ua kanë bërë atyre para, gjatë dhe pas luftës duke i vrarë, djegur, rrahur, maltretuar, nënçmuar. Ata thanë se ka ardhë koha që provokimeve të ekstremistëve serbë t’u ipet fund, në mënyrë që në ato hapësira shqiptarët, por edhe pjestarët e komuniteteve tjera të jetojnë në paqe dhe pa probleme. Shumë banorë të Suhadollit treguan se i njohin me emra dhe me numra identifikues pjestarët serbë të SHPK-së që i kanë udhëhequr ekstremistët serbë për të shkaktuar incidentin e së mërkurës.

Duke kërkuar ndihmën e institucioneve komunale, për të cilën thanë se nuk u ka munguar kurrë, sidomos ajo e kryetarit Spahija, si dhe ndihmën e institucioneve ndërkombëtare, posaqërisht të kompetentëve për siguri, për parandalimin e provokimeve dhe ekceseve të kujtdo qoftë, banorët e Suhadollit thanë se janë të paluhatshëm për të qëndruar në pronat e tyre dhe shumë të vendosur për të mos lejuar më provokime qafre ishin ato të së mërkurës.

Kryetari i Kuvendit të Komunës, Faruk Spahija, pasi që shprehu keqardhje për incidentin e fundit, duke i ndarë me këtë rast shqetësimet e tij me banorët e Suhadollit, shprehu mirënjohje për qëndrimin dhe maturinë e suhadollasve me rastin e incidentit të shkaktuar nga ekstremistët serbë.

Kryetari Spahija, u tha suhadollasve se ju gjatë gjithë kohës së pasluftës jeni treguar të gatshëm dhe keni marrë përgjegjësinë për ruajtjen e paqes në hapësirat ku jetoni dhe se zgjidhjen e problemeve me të cilat jeni ballafaquar e keni kërkuar përmes rrugëve institucionale, prandaj kjo duhet të çmohet dhe vlerësohet, por është fatkeqësi që institucionet nuk janë treguar çdoherë në nivelin e përgjegjësisë së tyre për t’ju dalur në ndihmë.

Pasi që tha se ajo që ka ndodhur nuk është e rastësishme, kryetari Spahija, tha se ka edhe të atillë që rezultatet që po i arrijnë institucionet e vendit dhe ato komunale në të gjitha fushat nuk iu konvenojnë, por përkundrazi janë pengesë për realizimin e synimeve të tyre te errëta.

Ai u tha suhodollasve se do të angazhohet si gjithnjë maksimalisht që në bashkëpunim me kompetentët për siguri, të marrë të gjitha masat për ruajtjen e paqes dhe të arriturave në këto hapësira, si dhe për pamundësimin e veprimeve të ekstremistëve kushdo qofshin ata, duke kërkuar njëkohësisht syqeltësi, maturi dhe sjellje të dinjitetshme të banorëve të Suhadollit, ashtu sikur janë treguar deri tash.

Përfaqësuesit e batalionit danez të KFOR-it, u thanë qytetarëve të Suhadollit se diskutimet e tyre ishin korrekte, kërkesat e arsyeshme dhe ua sqaruan atyre mënyrën e re të veprimit të këtij batalioni, që është në funksion që është si rezultat i përmirësimit të situatës dhe i normalizimit të jetës në Suhadoll dhe rrethinë.

Komandanti i SHPK-së për rajonin e Mitrovicës, nënkoloneli Ergin Mediq, e vlerësoi si shumë të mirë tubimin e banorëve të Suhadollit dhe u premtoi atyre se do të angazhohet për ndriçimin e plotë të rastit dhe për marrjen e masave ndaj të gjithë atyre që kanë rënë ndesh me ligjin, pra edhe ndaj pjestarëve të SHPK-së që e kanë keqpërdorë uniformën e SHPK-së.

Nënkoloni Mediq, u tha suhadollasve se SHPK-ja po aftësohet çdo ditë për të ruajtur paqen dhe për krijuar kushte për siguri të plotë të qytetarëve, duke kërkuar nga ata që të bashkëpunojnë me pjestarët e SHPK-së, por edhe me policinë e UNMIK-ut dhe të KFOR-it.

Pas diskutimeve të shumta dhe konstruktive, të pranishmit në takim, si banorët, ashtu edhe mysafirët u dakorduan për miratimin e konkluzioneve të propozuar që kanë për qëllim parandalimin e incidenteve, ruajtjen e paqes, ngritjen e nivelit të sigurisë, krijimin e kushteve për lëvizje të lirë dhe përmirësimin e jetës të banorëve të Suhadollit.

Ndër nëntë konkluzionet e miratuara, që kryesisht u adresohen UNMIK-ut, policisë dhe KFOR-it, janë edhe ato në të cilat kërkohet  që të ndërpriten të gjitha provokimet e ekstremistëve serbë të lagjës “Kroi i Vitakut” ndaj banorëve të fshatit Suhadoll, që të kriohet siguri për bujqit  që normalisht të punojnë pronat e veta bujqësore pa u penguar nga ekstremistët serbë, të mundësohet qarkullimi i lirë i të gjithë qytetarëve në aksin rrugor Vinarc i Epërm – Mitrovicë pa dallim përkatësie etnike, të ndërmirren të gjitha masat ligjore ndaj personave që prishin rendin dhe qetësinë dhe ta marrin dënimin e merituar, të ndërpritet indiferenca e policisë së UNMIK-ut ndaj ekstremistëve serbë, të mundësohet shtrirja e pushtetit lokal në pjesën veriore.(ZMP)