Kryetari i Kuvendit të Komunës, Faruk Spahija me bashkëpunëtorë, ka patur një takim me shefin e Zyrës për Kthim dhe Komunitete, Killen Kalein Schmidit, përfaqësuesin rajonal të UNMIK-ut, ambasadorin Rashid Ahmed dhe përfaqësuesin komunal të UNMIK-ut, Jouzas Kazlas.

Kryetari i Kuvendit të Komunës, Faruk Spahija, ka falenderuar mysafirët për interesimin e treguar për të ndihmuar pushtetin lokal në realizimin e procesit të kthimit, të të gjithë të zhvendosurve pa marrë parasysh përkatësinë etnike, në pronat e tyre.

Kryetari Spahija, duke bërë fjalë për procesin e kthimit në komunë, u ka thënë mysafirëve, se përpjekjet e udhëheqjes komunale dhe të institucioneve të pushtetit lokal për të realizuar këtë proces kanë arritur në pikën që premton zgjidhje pozitive.

Duke i sqaruar të pranishmit se në Mitrovicë është numri i madh i familjeve të zhvendosura, nga radhët e të gjitha komuniteteve, të cilat presin që të përfitojnë nga kthimi, që është një e drejtë e tyre e patjetërsueshme, Kuvendi i Komunës ka aprovuar një strategji për kthim, me të cilën parashihet që të gjithë të përfshihen në procesin e kthimit.

Kryetari Spahija, ka thënë se me strategjinë e lartëpërmendur janë paraparë edhe fazat prioritare të kthimit dhe se në bazë të kësaj tani  është duke u realizuar kthimi i serbëve në Frashër dhe fillimi i realizimit të projektit për kthimin e familjeve rome dhe ashkalinje në pronat e tyre, të cilat aktualisht janë duke jetuar në tri qendra kolektive në veri të qytetit, ndërkohë që duhet të bëhen përgatitjet edhe për kthimin gradual të shqiptarëve në pronat e tyre në pjesën veriore të qytetit. Ai me këtë rast ka shtruar domosdonë e respektimit të planit urban të komunës me rastin e realizimit të projektit për kthimin e romëve në lagjën e tyre. 

Në bisedë me mysafirët, kryetari Spahija, ka tërhequr vërejtjen e politizimit të paarsyeshëm të komunitetit romë, kur është fjala për kthimin në pronat e tyre në lagjën ku kanë jetuar më parë, prandaj edhe ka kërkuar nga ndërkombëtarët që në bashkëpunim me vendorët, të punojnë më shumë me përfaqësuesit e romëve për t’ua sqaruar kushtet dhe mundësitë që u ofron komuna atyre për të patur një jetë sa më të mirë, të qetë dhe të sigurtë, në mënyrë që ata të binden për këtë dhe të fillohet me realizimin e projketit.

Shefi i Zyrës për Kthim dhe Komunitete, Killen Kalein Schmidit, tha se takimi me kryetarin e komunës, është një rast i mirë për të biseduar për këtë çështje mjaft komplekse dhe shumë të theksuar në këto hapësira.

Schmidit, tha se procesi i kthimit nuk duhet të jetë i njëanshëm, por në të duhet të përfshihen të gjithë, sepse njerëzit duhet  të kthehen në pronat e tyre, për të shtuar se në bisedimet që lidhur me këtë çështje janë bërë në Beograd, është diskutuar edhe plani për kthimin e të zhvendosurve në pjesën veriore, si pjesë e kthimit të përgjithshëm.

Shefi i Zyrës për Kthim dhe Komunitete, Schmidit, ka thënë paoshtu se si parim kryesor i cili duhet të aplikohet për kthimin e të zhvendosurve, është çështja e rindërtimit të objekteve të banimit. Ai me këtë rast shprehu edhe kënaqësinë e kryeadministratorit të Kosovës, Petersen, për përpjekjet e pushtetit lokal të Mitrovicë për kthimin e romëve në lagjen e tyre, për të shtuar se kjo që po bëhet është e drejtë, çon përpara dhe është sinjal se është duke u thyer akulli në këto projkete, që janë madhore, duke premtuar njëkohësisht ndihmë dhe përkrahje. 

Killen Kalein Schmidit,  në bisedë me kryetarin Spahija dhe përfaqësuesit e UNMIK-ut, tha se procesi i kthimit të romëve është çelës kyq për plotësimin e standardeve dhe proceseve tjera në Kosovë, prandaj shtroi nevojën që të shënohet progres në këtë drejtim, por edhe vënien e dialogut, me qëllim të  implementimit të standardeve, gjë që do të ishte mirë edhe për përgatitjen e raportit të Petersenit, që do të paraqitet në Këshillin e Sigurimit në muajin maj. Ai u shpreh se është shumë qenësore që qytetarët të kuptojnë se implementimi i standardeve nuk është truk politik, por krahas kësaj do të përmirësohen edhe kushtet për jetesë.(ZMP)