Kryeshefi i Ekzekutivit të Kuvendit të Komunës, Mustafë Pllana, ka nënshkruar një memorandum me donatorët tajlandez, të përfaqësuar nga dr. Sigmund Cerkini dhe mr. Ek Palagavong Na Ayudha, për ndihmë komunës së Mitrovicës në vlerë prej 18 milion eurosh.

Me memorandumin e nënshkruar parshihet që në komunën e Mitrovicës të ndërtohen katër ndërtesa banimi, me rreth 250 njësi banesore, për familjet me gjendje të rëndë sociale, një objekt i shkollës së mesme, një ndërtesë për fëmijët bonjak me të gjitha objektet përcjellëse siq janë pishina, fushat të ndryshme sportive, etj., si dhe një objekt për personat e hendikepuar.

Dr. Sigmund Cerkini, tha se realizmi i projekteve nga donacioni i  ofruar për komunën e Mitrovicës, mund të filloj qysh në fillim të muajit shtator, sidomos ndërtimi i objekteve banesore.

“Qëllimi i këtij donacioni është që njerëzve që kanë gjendje të rëndë sociale t’ua lehtësojmë sadopak gjendjen. Ne do të përkujdesemi vazhdimisht që këtyre familjeve t’ju mundësojmë kushte sa më të mira për jetë, përfshirë këtu shkollimin, shëndetësinë, punën, etj.”, tha Cerkini.

Cerkini, premtoi se në Mitrovicë do të ndërtojë edhe një fabrikë të tekstilit, ku do të punësoheshin rreth 150 punëtorë, kryesisht anëtarë të familjeve që do të jenë përfitues të banesave nga ky donacion.

Kryeshefi i Ekzekutivit, Mustafë Pllana, në emër të Kuvendit të Komunës dhe qytetarëve, falënderoj biznismenët tajlandez për këtë donacion mjaft të rëndësishëm dhe tha se donacioni I ofruar do të mundësoj zbutjen e rëndësishme të problemeve të banimit, të shkollimit dhe problemeve të bonjakëve në komunën e Mitrovicës.

Kryeshefi Pllana, tha se për realizimin e projketeve nga ky donacion komuna do t’i bëjë të gjitha përgatitjet, duke krijuar kështu kushtet optimale për fillimin e punëve dhe premtoj se komuna do të jetë shumë e kujdesshme në përzgjidhjen e përfituesve dhe në menagjimin e projekteve. (ZMP)