Numri i qenëve endacak në komunën e Mitrovicës, është shtuar aq shumë sa që ata ka kohë që vërtetë janë bërë kërcnim për sigurinë, jo vetëm të fëmijve, por edhe të qytetarëve në përgjithësi.

Duke vlerësuar se këta qenë paraqesin rrezik për jetën e qytetarëve, sepse në disa raste këta qenë kanë shfaqur tendenca shumë agresive ndaj njerëzve, për çka komuna dhe policia kanë marrë ankesa të shumta, stacioni jugor i policisë në Mitrovicë, ka marrë vendim që të zhvillojë një operacion për reduktimin e këtij numri.

Operacioni i policëve nga stacioni jugor, do të zhvillohet në bashkëpunim me Shoqatën e Gjuetarëve “Trepça” dhe është mbështetur nga Kuvendi i Komunës së Mitrovicës.

Operacioni i vrasjes së qenëve endacak në komunën e Mitrovicës, do të fillojë më 28 gusht dhe do të zgjas deri më 25 shtator 2005, kurse koha e vrasjes së qenëve do te jetë prej orës tre deri në orën shtatë të mëngjesit.

Gjuetarët nga shoqata e gjuetarëve, nën drejtimin e policëve të SHPK-sës do t’i gjuajnë qenët endacak vetëm gjatë ditëve të diela brenda periodës së lartëpërmendur. Operacioni për vrasjen e qenëve endacak do të zhvillohet në vendbanimet rurale Sheshi i Vjetër, Tuneli i parë, Rekë, Shupkovc, Frashër, Vaganicë, Shipol e  Zhabar, si dhe në zonat e qytetit “2 Korriku”, “Ura e gjakut”, “Iliridë”, “Bair” dhe “Qendër”. (ZMP)