Komiteti për Arsim i Kuvendit të Komunës, kryesuar nga Mursel Ibrahimi, kryetar, ka shqyrtuar përgaditjet për fillimin e vitit të ri shkollor 2005/2006, në komunën e Mitrovicës.

Anëtarët e Komitetit fillimisht ua kanë uruar nxënësve dhe mësimdhënësve fillimin e vitit të ri shkollor, duke u dëshiruar punë të mbarë dhe suksese në mësime.

Në vazhdim, Komiteti për Arsim ka konstatuar se janë bërë përpjekje të mëdha për krijimin e kushteve për fillim të mbarë të vitit të ri shkollor dhe për punë normale të nxënësve dhe mësidhënësve në komunën e Mitrovicës.

Megjithëkëte, anëtarët e komitetit kanë konstatuar se si pasojë e mosintegrimit të qytetit, një numër i madh i objekteve shkollore që gjenden në pjesën veriore të qytetit, do të mbesin edhe gjatë këtij viti shkollor të pashfrytëzuara nga nxënësit shqiptarë, gjë që do t’i detyrojë këta  që mësimet t’i ndjekin në kushte mjaftë të vështira hapësinore në objektet shkollore të pjesës jugore të qytetit.

Kështu, edhe gjatë këtij viti, në tri objekte shkollore të qytetit, mësimi do të mbahet në tri ndërrime, për ç’arësye orët do të zgjasin vetëm nga 35 minuta, situatë kjo që do të paraqes vështirësi të mëdha për realizimin e planprogrameve të lëndëve mësimore.

Komiteti për Arsim në këtë mbledhje mori vendimin që nxënësit e shkollës fillore “Meto Bajraktari”, të kthehen sërish në objektin e tyre shkollor që gjendet në lagjen “Bair”, ndërkohë që nxënësit e shkollës së mesme teknike “Arkitekt Sinani”, që mësimin deri tash e mbanin në objektin e shkollës së lartëpërmendur, gjatë këtij viti shkollr t’i ndjekin mësimet në lokalet e shkollës fillore “Andon Zako Çajupi”.

Sidoqoftë, anëtarët e Komitetit për Arsim të Kuvendit të Komunës, vlerësuan se janë bërë përgaditje serioze që edhe në këto kushte të rënda, viti i ri shkollor në komunën e Mitrovicës të mund të fillojë punën mbarë dhe mësimi të vazhdohet normalisht, si dhe premtuan se qysh tash do të fillojnë aktivitetet për përmisimin e kësaj gjendjeje të rëndë në arsimin e komunës, në mënyrë që viti i ardhshëm shkollor të vazhdojë në kushte krejtësisht normale. (ZMP)