Shefi i misionit të OSBE-së në Mitrovicë, Alastair Livingston, i shoqëruar nga administratori komunal i UNMIK-ut, Juozas Kazllas, ka vizituar kryetarin e Kuvendit të Komunës, Mursel Ibrahimi, për t’i shprehur ngushëllime për kryetarin e vendit, dr Ibrahim Rugova.

Livingston ka thënë me këtë rast se ndonëse përfaqësuesit e misionit të OSBE-së në Mitrovicë dhe përfaqësuesit tjerë ndërkombëtarë kanë shprehur ngushëllime për vdekjen e kryetarit Rugova, nuk munda të durohem pa ardhur edhe vetë personalisht, për të shprehur ngushëllime, sepse ndjejë respekt të madh për kryetarin e ndjerë Ibrahim Rugova.

Pasi që ka lutur kryetarin Ibrahimi që ngushëllimet t’ua përcjellë edhe qytetarëve të komunës, Livingston ka thënë se dr Rugova ishte një personalitet i madh dhe se vdekja e tij është një humbje e madhe për Kosovën dhe qytetarët e saj dhe se i vjen shumë keq që kryetari Rugova vdiq para se t’i shoh frytet e punës së tij.

Shefi i misionit të OSBE-së në Mitrovicë, Alastair Livingston, i tha kryetarit Ibrahimi se Kosova me rastin e varrimit të dr Rugovës, përfaqësoi botën në miniaturë dhe se për herë të parë bota e pa Kosovën në një vend, duke vlerësuar njëkohësisht se kjo ngjarje ishte ngjarja më e madhe e tillë që bota ka parë kohëve të fundit.

Ndonëse kishin ardhur për të shprehur ngushëllime, Livingston dhe Kazllas i thanë kryetarit Ibrahimi se e kanë njoftuar PSSP-në Petersen për gjendjen e rëndë në furnizimin me energji elektrike të komunës së Mitrovicës, si dhe kërkuan nga ai që për këtë gjendje ta njoftojë Qeverinë e Kosovës.

Që të tre bashkëbiseduesit vlerësuan njëzërit se kjo gjendje është e padurueshme dhe se mund të rezultojë me pasoja të padëshirueshme për shkak të pakënaqësisë së qytetarëve, andaj apeluan tek KEK-u që të ndërmarrë masa dhe të bëjë një shpërndarje me të balancuar të energjisë elektrike në vend.

Kryetari Ibrahimi i njoftoi mysafirët se ka paraparë për në orët e pasditës një takim me menagjerin e Distribucionit të KEK-ut në Mitrovicë, nga i cili do të kërkojë informacion të plotë për gjendjen në furnizim me energji elektrike të komunës dhe se do t’i njoftojë ata për rezultatet e bisedës. (ZMP)