Rreth 200 qytetarë të “Lagjes së Boshnjakëve”, kanë protestuar të mërkurën në mbrëmje në lagjen e tyre, duke e bllokuar rrugën tek ura lindore, për të shprehur pakënaqësinë e tyre për mungesën e enregjisë elektrike.

Duke parë se protesta mund të eskalojë dhe se paraqet rrezik për gjendjen e sigurisë për shkak raporteve specifike që mbretërojnë në këtë lagje veriore të qytetit, vendin e ngjarjes e kanë siguruar disa patrulla policore, ndërkohë që pas orës 19:00 aty kanë arritur kryetari i Kuvendit të Komunës, Mursel Ibrahimi dhe kryeshefi i Ekzekutivit të Kuvendit të Komunës, Sadri Ferati, të shoqëruar nga administratori komunal i UNMIK-ut, Jouzas Kazllas.

Qytetarët u ankuan tek udhëheqja komunale se kanë mungesë të madhe të energjisë elektrike dhe se kjo gjendje është e padurueshme meqë kjo bëhet vetëm në lagjet e banuara me shqiptarë dhe jo në ato të banuara me serbë. Kryetari i Kuvendit të Komunës, Mursel Ibrahimi, ju premtoi qytetarëve se do të mbledh informata të sakta lidhur me problemet në furnizim me energji elktrike të lagjes dhe se do të bëjë përpjekje maksimale për të tejkaluar këtë gjendje, për çka u tha se do të thërras një takim urgjent për ditën e enjtë.

Në takim e mbajtur sot, në ambientet e Kuvendit të Komunës, ku përveç kryetarit të Kuvendit të Komunës, Mursel Ibrahimi ishin prezent edhe administratori komunal ndërkombëtarë, Jouzas Kazllas, menaxheri i KEK-ut në Mitrovicë, Jusuf Topalli dhe përfaqësuesi i lagjes Xheladin Peci, u konstatua se gjendja e rëndë në furnizimin me energji elektrike në këtë lagje, është pasojë e prishjes së transformatorit furnizues në këtë lagje. Menaxheri Topalli tha se prishja e transformatorit ka ardhur për shkak të mbingarkesës tejmase të tij.

Ai tha se transformatori ishte instaluar para pesë – gjashtë ditësh, për shkak se për të njejtat shkaqe ishte prishur edhe ai i mëparshmi, mirëpo për shkak të rrethanave specifike në të cilat jetojnë banorët e kësaj lagje veriore, KEK-u kishte bërë lëshim, duke instaluar transformatorin e dytë, i cili për shkak të ngarkesës tejmase nga shfrytëzimi i pakontrolluar i rrymës është prishur shumë shpejt. Poashtu, menaxheri Topalli tha se KEK-u nuk e bënë faturimin e rrymës së harxhuar në këtë lagje për shkak të rrethanave specifike, ndërkohë që aty ka edhe keqpërdorime të tjera, siç janë kyçjet ilegale, vjedhja e rrymës, dëmtimet e shtyllave, etj., mirëpo KEK-u bëri lëshim duke e instaluar transformatorin tjetër, kurse tani nuk ka kurrëfarë mundësish për të tejkaluar gjendjen menjëherë.

Megjithkëtë, kryetari i Kuvendit të Komunës, Mursel Ibrahimi, administratori komunal Jouzas Kazllas dhe menaxheri Jusuf Topalli, u morën vesh që të angazhohen maksimalisht, tek KEK-u, duke i shfrytëzuar të gjitha mundësitë për gjetjen edhe të donacioneve eventuale, për të bërë zgjidhjen për gjetjen e një transformatori, por me kapacitet më të madh, duke kërkuar njëkohësisht nga banorët e lagjes që të kenë mirëkuptim dhe durim që të mos e tensionojnë situatën. (ZMP)