Në ceremoninë e ndërrimit të komandës së Task Forcës Shumëkombëshe Veri, që është mbajtur të premtën në Frashër të Mitrovicës, komandanti i KFOR-it, Guisepse Valoto, ka dekoruar me medaljen e Meritës së NATO-s, ushtarin me prejardhje shqiptare, Ilir Bajraktari.

Kjo medale, e cila në vit i ipet vetëm dy ushtarëve të NATO-s, Ilir Bajraktarit i është dhënë pasi që ai në armatën franceze dhe në detyrë të BSHVL-së në Kosovë, që nga 26 maji 2005 si përkthyes në gjuhën shqipe i gjeneralit, ka kryer një punë të mrekullueshme dhe ka treguar gjithnjë afërsi njerëzore dhe profesionale të jashtëzakonshme. Më tutje në arsyetimin lidhur me këtë dekorim thuhet se Ilir Bajraktari, është lindur në një familje shqiptare të Kosovës.

Ai me njohuri të plotë të gjuhës, të njerëzve, mendimeve dhe të zakoneve të gjuhës shqipe dhe të popullit i cili jeton në Kosovë, e ka shfrytëzur rastin që t’i përmirësojë njohuritë e tij kulturore me një përvojë operacionale në Ballkan nën komandën e NATO-s.  Që nga janari 1999, i ka kryer më shumë se 20 muaj misione, së pari në Maqedoni por më së shumti në Kosovë.

Duke punuar gjithnjë si përkthyes basnik e serioz ai ka qenë çdo herë një ndërmjetësues i çmueshëm nga kosovarët dhe nga autoritetet franceze. Akionet e tij të përditshme i kanë mundësuar rregullisht gjeneralit ta fton besimin tek shqiptarët e Kosovës ashtu edhe që të zhvillon mardhënie të sinqerta. Ai veçanërisht ka kontribuar në suksesin e NATO-s në Kosovë dhe pa dyshim e ka merituar shpërblimin nga NATO-ja me medaljen e meritës.

Pas marrjes së medaljes Ilir Bjaraktari ka deklaruar se ndihet shumë i lumtur dhe i nderuar për këtë medalje dhe për mundësinë që i është dhënë për të shërbyer për popullin e Kosovës.

“Kjo medalje është meritë edhe e bashkëshortes sime e cila gjithashtu është ushtare, dhe ka shërbyer në Kosovë vite më parë. Ajo ka bartë në vete barrën e familjes gjatë kohës sa isha unë në mision në Kosovë”, u shpreh Bajraktari. (ZMP)