Përfaqësues të Minsitrisë për Kulturë, Rini dhe Sport, me në krye drejtorin e Departamentit për Mardhënie me Publikun, Veli Bytyqi, të shoqëruar nga kryetari i Kuvendit të Komunës së Mitrovicës, Mursel Ibrahimi, kanë vizituar fshatin e vetëm me popullatë të përzier të kësaj komune, Frashër, për t’u njohur për së afërmi me disa probleme që janë paraqitur në realizimin e projektit të Qeverisë së Kosovës, për rindërtimin e shtëpive të shkatërruar në ngjarjet e marsit të vitit 2004.

“Motivi i ardhjes tonë në Frashër është që nga pronarët e shtëpive dhe përfaqësuesit e kompanive që i kanë rindërtuar shtëpitë, të dëgjojmë dhe të shohim se ku janë problemet që janë paraqitur, si dhe të ndërmarrim masa të duhura për tejkalimin e tyre sa më shpejtë”, u shpreh Bytyqi.

Drejtori i Departamentit për Mardhënie me Publikun, Veli Bytyqi, tha se punëkryerësit i kanë përfunduar punët e kontraktuara në kuadër të projektit të Qeverisë, por më vonë është konstatuar se kanë mbetur edhe disa punë të vogla që duhet të përfundojnë gjithsesi në mënrë që të motivohen pronarët serbë të shtëpive, që janë zhvendosur dhe jetojnë në veri të Mitrovicës, të kthehen në pronat e tyre.

“Unë mendoj, pa marrë parasysh se kanë mbetur disa punë të imëta për tu kryer, se në Frashër janë krijuar plotësisht kushtet për kthim të serbëve të zhvendosur. Këtu janë rindërtuar 137 shtëpi me mjete të Qeverisë së Kosovës, në shumë prej mbi katër million euro, pastaj pronarëve u janë dhënë mjete shtesë për objektet ndihmëse, ndërkohë që janë krijuar kushte të mira të sigurisë dhe se është krijuar një disponim tek fqinjtë e tyre shqiptarë që ata të kthehen, prandaj nuk ka asnjë arsye, që serbët të qëndrojnë akoma në kampe të ndryshme e të mos kthehen për të jetuar në pronat e tyre”, ka thënë Bytyqi.

Sipas tij, me mjete të Qeverisë së Kosovës, në tërë vendin janë rindërtuar 887 shtëpi të shkatërruara në ngjarjet e marsit të vitit 2004, gjë që flet për përkushtimin e institucioneve të vendit për krijimin e kushteve për jetë normale të pjestarëve të të gjitha komuniteteve.

Duke u përgjegjur në pyetje të gazetarëve lidhur me mundësinë e shitjes së pronave të rindërtuara nga ana e serbëve, Bytyqi tha se ne respektojmë të drejtën e pronës dhe të menaxhimit të saj nga pronarët, por nuk do të ishte në rregull që të bëhet biznes me këto shtëpi, andaj edhe apelojmë tek pronarët që të kthehen e të jetojnë në to. Ai njëkohësisht u shpreh kundër përpjekjeve të disa pronarëve që në këtë situatë të vështirë të kërkojnë që për ta të krijohen benifite dhe të përfitojnë nga këto.

Poashtu, Bytyqi, bëri të ditur se kompanive përfituese për rindërtimin e shtëpive nuk i janë paguar të gjitha mjetet për punën e bërë me qëllim që ato t’i kryejnë dhe këto punë të vogla për të cilat vërejtje kanë dhënë pronarët.

Edhe kryetari i Kuvendit të Komunës së Mitrovicës, Mursel Ibrahimi, konsideron se janë krijuar kushte për kthim të serbëve në Frashër.

“Kuvendi i Komunës ka bërë çmos që të krijojë kushte për kthimin e serëbve të zhvendosur gjatë ngjarjeve të marsit të vitit 2004 dhe kjo falë mjeteve që ka ndarë Qeveria e Kosovës. Shqiptarët e fshatit kanë deklaruar se nuk kanë asgjë kundër kthimit të srebëve në pronat e tyre në Frashër, ndërkohë që SHPK-ja e ka shtuar masat e sigurisë dhe me këtë mendojë se janë krijuar kushte për jetë nornale të tyre këtu. Ne i kemi ftuar ata edhe më parë dhe i ftojmë edhe tash që të kthehen në shtëpitë e rindërtuara, ndërkohë që sot po mirremi vesh me kryerësit e punëve dhe përfaësuesit e Qeverisë, që të evitohen edhe ato vërejtje që i kanë banorët”, tha Ibrahimi.

Ndërkaq, njëri nga serbët e kthyer në Frashër, Voisllav Joviq në oborrin e shtëpisë së tij u tha përfaqësuesve të Minsitrisë dhe kryetarit Ibrahimi, se ai është i kënaqur me punët që janë kryer në shtëpinë e tij.

“Unë jam i pari që jam kthyer në Frashër dhe mund të them se këtu kam kushte të plota për jetë normale. Me fqinjtë shqiptarë kaloj mirë dhe asnjëherë deri më tash nuk kam pasur probleme dhe nuk bësoj se do të kem. Edhe me rindërtimin e shtëpisë dhe të objektit ndihmës të cilin e ka ndërtuar TMK-ja me mjete të BSHVL-së jam i kënaqur”, tha Joviq. (ZMP)