Ndonëse është përkeqësuar moti dhe bora i ka mbuluar rrugët, ato në komunën e Mitrovicës, pothuaj të gjitha janë të kalueshme.

Disa banorë të rajonit të Shalës së Bajgorës, ku zakonisht temperaturat janë më të ulta dhe ku fërfëllëza e borës i mbyllë rrugët, kanë njoftuar në Zyrën për Marëdhënie me Publikun të Kuvendit të Komunës, se rruga e asfaltuar e cila përshkon përmes tërë rajonin deri në Kaqnadoll, është e kalueshme, falë masave që ka ndërmarrë organizata që është përgjegjëse për mirëmbajtjen e saj “Kastrioti” nga Runiku.

Sipas tyre, automjetet me paisje dimërore mund të qarkullojnë pa probleme nëpër këtë rrugë, ndërkohë që ato anësore, janë më të vështira për kalim.

Sidoqoftë, qindra familje nga qyteti, me automjetet  e tyre e kanë kaluar ditën në ambientet e bukur piktoreske të këtij rajoni dhe në objektet hoteliere që gjinden në te.

Ndërkaq, drejtori i Drejtorisë për Mbrojtje Civile dhe Gadishmëri Emergjente, Xhevat Veseli, ka njoftuar se gjatë fundjavës, komuna ka ndërmarrë masa, duke e angazhuar Ndërmarrjen “Magjistralja”, për hapjen e  rrugës për në fshatin Kovaqicë të rajonit të Shalës së Bajgorës, ku për disa ditë, për shkak të ortiqeve të borës, kanë mbetur të izoluara 32 familje të këtij fshati.

Disa banorë të rajonit të Shalës së Bajgorës, thanë të dielën se rruga e hapur për në Kovaqicë, nuk është mbyllur  deri në orët e pasdites të së dielës. (ZMP)