Organizuar nga Qendra për përparimin e edukimit dhe arsimit në Ferizaj dhe OJQ “Together” nga Lubjana, në ambientet e hotelit “Palace” në Mitrovivë, pas tri ditë punimesh, të dielën ka përfunduar seminari psiko-social, për mësimdhënësit e shkollave të komunës së Mitrovicës dhe të Skenderajt.

Në seminar kanë marrë pjesë 50 mësimdhënës dhe 10 trajnues nga këto komuna. Seminari është mbështetur nga Ministria e Arsimit, Shkencës dhe Teknologjisë, kurse është përkrahur materialisht nga Qeveria e Irlandës dhe është monitoruar nga dr Anica Mikus-Kos, psikiatre  për fëmijë nga Lubjana.

Në ditën e fundit të punimeve, në seminar kanë marrë pjesë Ramush Lekaj, udhëheqës i sektorit për planprograme në MASHT, kryetari i Kuvendit të Komunës së MItrovicës, Mursel Ibrahimi, kryeshefi i Ekzekutivit të komunës së Mitrovicës, Sadri Ferati dhe drejtori i Drejtorisë së Arsimit në këtë komunë, Murteza Berisha.

Udhëheqësi i sektorit për planprograme në MASHT, Ramush Lekaj, tha se në seminar janë trajtuar tema të ndryshme psiko-sociale dhe pedagogjike, të cilat janë ligjëruar nga ekspertët shkollor dhe të tjerë siç janë pedagogët, psikologët, psikiatrit etj.

“Seminaret e këtilla mbahen në katër module, që zgjasin nga tri ditë. Në këtë modul, që është i dyti me radhë,  janë trajtuar tema për klimën psiko-sociale në klasë dhe shkollë, raportet mësues-nxënës, frika dhe fobia shkollore, dhuna në shkollë, dhuna midis moshatarëve, edukimi prosocial etj. Port, ishte mjaftë i rëndësishëm edhe këmbimi i përvojave të mësimdhënësve lidhur me çështjet e trajtuara”, tha Lekaj.

Sipas Lekajt, meqë seminaret e këtilla janë shumë të rëndësishëm, deri tash në Kosovë janë mbajtur shumë sish dhe në to janë përfshi 25.000 mësismdhënës. “Seminaret e këtilla ndikojnë mjaftë në zhvillimin e reformave shkollore në Kosovë.

Në përfundim të seminareve, mësimdhënësve u jipen edhe materiale ndihmëse të shkruara, libra, broshura etj, që kanë të bëjnë me tema të ndryshme të trajtuara”, ësshtë shprehur ndër të tjera Ramush Lekaj.

Ndërkaq, monitoruesja e seminarit nga Lubjana, Anica Mikus Kos, tha se seminaret e këtilla kanë rëndësi të madhe për mësimdhënsit në Kosovë, sepse popullata në Kosovë ka qenë e traumatizuar nga lufta, kurse para lufte ka jetuar në frikë dhe varfëri, gjë që është dëmtuar shëndeti mental.

“Qëllimi i mbajtjes së seminareve të këtilla është që tu ndihmohet mësimdhënësve, që atyre t’u jipen njohuri të reja dhe energji, për të mundur ata të qëndrojnë në realizimin e misionit dhe rolit të tyre me nxënës, sepse, sikur dihet, edhe mësimdhënsit kanë përjetuar tërë atë që e kanë përjetuar nxënësit dhe jetojnë në varfëri të madhe”, është shprehur fillimisht psikiatria nga Lubjana, Anica Mikus Kos.

Ajo në vazhdim ka thënë se krenohet me mësimdhënësit e Kosovës, që ka takuar mbi 2.000 sish, për faktin se si ata po arrijnë të ndihmojnë nxënësit e tyre, kur dihet se çka kanë përjetuar dhe në çfarë kushtesh jetojnë. “Unë kam respekt për këta mësimdhënës dhe mendoj se programet e këtilla janë shumë të rëndësishme për një vend sikur është Kosova, që ka shumë fëmijë. Ne këto programe i drejtojmë zakonisht në zonat që kanë pësuar më së shumti dhe që janë më të varfra, sikur është Skenderaj, Mitrovica etj”, ka përfunduar Anica Mikus Kos.

Ndërkaq, kryetari i Kuvendit të Komunës së Mitrovicës, Mursel Ibrahimi, përshëndetur organizimin e seminarev të këtilla dhe të ngjashëm, si dhe ka falëndruar mësimdhënësit për përkushtimin e tyre, që të fitojnë njohur të reja dhe t’i avansojnë metodat e  mësimdhënjes, për të ndihmuar nxënësit, që janë pasuria jonë më e madhe kombëtare. (ZMP)