“Situata e sigurisë në zonën time të përgjegjësisë aktualisht është e mirë. Unë garantoj për liri të lëvizjës si në jug ashtu edhe në veri mirëpo, pse qytetarët, si shqiptarët ashtu edhe serbët, nuk kalojnë prej jugut në veri dhe anasjelltas, përgjegja mund të gjindet në zemrën dhe mendjen e secilit prej tyre”, ka thënë , Jean Philippe Margueron, komandant i Njësisë  Vepruese Shumëkombëshe Veri (NJVSHKV) të KFOR-it, ish BSHVL-ja, në konferencën e parë me gazetarët mitrovicas.

“Organet e rendit siç janë policia e UNMIK-ut dhe SHPK-ja ekzistojnë dhe funksionojnë mire dhe ato duhet të vazhdojnë punën e tyre, sepse gjithmonë ka individ të cilët e shkelin ligjin dhe rregullat tjera, sikur që ka të tillë kudo në botë. Mirëpo, më inkurajon popullata, për të cilën kam fituar përshtypjen se është shumë e qetë dhe dinjitoze. Unë do të vazhdojë rrugën e paraardhësve të mij dhe të KFOR-it, duke mos lejuar që zona nën përgjegjësinë time të shndërrohet në një vend ku mbizotëron pasiguria”, është shprehur gjenerali Margueron.

Pasi që ka përsëritur se misioni i NJVSHKV-së nuk ka ndryshuar dhe se ajo është këtu për të mirën e të gjithë banorëve, pa marrë parasysh përkatësinë e tyre, gjenerali Margueron ka thënë qëllimi i ushtarëve të tij është që në bashkëpunim me UNMIK-un dhe SHPK-në, që të përkujdeset që dhuna  të jetë në nivel sa më të ulët dhe që të ndihmojë rikthimin e besimit në mes të bashkësive, si dhe të krijojë kushte për të gjetur zgjidhjen politike të problemeve, gjë që është e natyrshme.

Ai ka shtuar se për të arritur këtë qëllim, trupat e tij dhe ai personalisht i kushtojnë rëndësi të madhe mbajtjes së kontakteve sa më të shpeshta me të gjitha autoritetet publike dhe morale të zonës së përgjegjësisë në të cilën veprojnë.

Kreu i  NJVSHKV, në bisedë me gazetarët mitrovicas ka rikujtuar se KFOR-i në rastet ekstreme mund të përdor forcën.

“Ushtarët e mi, një pjesë e të cilëve sapo është kthyer nga Afganistani dhe nga Bregu i Fildidht, janë profesionistë që kontrollojnë në mënyrë të përkryer sjelljen dhe forcën e armëve të tyre”, ka thënë gjenerali Margueron, për të shtuar se “gazetarët duhet të mbështesin përpjekjet e përgjegjësve politik për të shmangur individët që kanë për synim krijimin dhe mbajtjen e një atmosphere urrejtjeje dhe frike, shpesh për arsye të fitimit personal”.

Gjenerali Margueron aktualisht me së shumti e shqetësojnë vështirsëitë e qytetarëve në jetën e përditshme, sidomos ato që kanë të bëjnë me dimrin e ashpër.

“Të gjithë këtu pësojnë nga problemet e mungesës së energjisë elektrike, mungon ngrohja, furnizimi me ujë. KFOR-i bënë përpjekje të ofrojë ndihmë humanitare emergjente, nëpërmjet aksionit civilo ushtarak siq është shpërndarja e ushqimeve, veshmbathjes, ujit etj.

Duke u përgjegjur në pyetjen e gazetarëve pse ende ushtarët qëndrojnë në hyrje të Qendrës së Kulturës “Rexhep Mitrovica”, komandanti i NJVSHKV-së, Margueron tha se ura mbi lumin Ibër ka qenë dhe është vend ku mund të paraqiten kriza, prandaj ushtarët e KFOR-it qëndrojnë aty afër për të ndërhyrë në rast nevoje. (ZMP)