Në gjashtëvjetorin e rënjes, gjatë përleshjeve me bandat serbe, në mbrojtje të bashkëkombasve të tij, që ishin sulmuar mizorisht nga ekstremistët serbë, në lagjen “Lumbardhi” në veriun e Mitrovicës, të hënën është zbuluar pllaka përkujtimore e dëshmorit të kombit Avni Haradinaj.

Pas përfundimit të luftës, para syve të ndërkombëtarëve, nga pjesa veriore e qytetit, dëboheshin nga shtëpitë e tyre familjet shqiptare dhe joserbe, duke u vra asokohe dhjetra qytetarë dhe duke u maltretuat qindra sish. Këtyre skenave nuk mund t’i rrinin duarkryq luftëtarët e lirisë, siç ishte edhe Avni Haradinaj.

Ai ishte njëri nga prijësit e protestave që organizonin banorët e kësaj ane kundër maltretimeve që u bënin esktremistët serbë,  dhe ai u vra nga një dorë kriminale, e cila sot e asaj dite mbeti e panjohur” tha Riza Haziri, kryetar i SHVL-së të UÇK-së. Ai shtoj se Haradinaj iu bashkua karvanit të dëshmorëve të kombit për tu bërë i pavdekshëm, gjaku i tij u bë simbol për liri dhe bashkimin e trojeve kosovare.

“Kjo pllakë përkujtimore në vendin e rënjes së tij, është bërë me qëllim që ta përkujtojmë çdoherë këtë dëshmor”, theksoi Haziraj. 

Pas recitimit të poezive kushtuar jetës dhe veprës së Haradinajt, pjesëmarrësit e këtij tubimi përkujtimor, kanë vënë kurora lulesh mbi varrin e tij tek varrezat e dëshmorëve në Shipol. Iniciativa për ndërtimin e pllakës përkujtimore të këtij dëshmori të kombit ishte e banorëve të “Lumëbardhit”, e cila ka gjetur mbështjetje morale dhe materiale tek kushërinjët, shokët dhe dashamirët e Haradinajt.  

Avni Haradinaj ishte pjesëtar i brigadës 142 “Mehë Uka” të Zonës Operative të Shalës, ku njihej si njëri nga luftëtarët më të guximshëm. Ai i shpëtoi luftës, por e qëlluan snajperistët pas luftës.   

Ai ra në altarin e lirisë me 13 shkurt të vitit 2000 në pjesën veriore të Mitrovicës, konkretisht në lagjen “Lumëbardhi”, në përpjekje për të shpëtuar nga kthetrat e barbarisë serbe, qytetarët shqiptarë që po iknin nga plumbat e serbëve, duke “luftuar” me valët e lumit Ibër. (ZMP)