Burimet e policisë në Mitrovicë kanë bërë të ditur se një vajzë 18 vjeqare, nga fshati Rudare, ka raportuar në polici se një taksist kishte tentuar ta dhunonte atë në veturën e tij në pjesën veriore të Mitrovicës.

Zëdhënësi i policisë së UNMIK-ut për rajonin e Mitrovicës, Larry Miller ka thënë se viktima e ka informuar policinë se ajo kishte hyrë në taksi dhe se taksisti ishte pajtuar që ta dërgonte atë në fshatin e saj.

“Mirëpo, në vend se ta dërgojë në fshat, taksisti e ka dërguar viktimën periferi, ku edhe e ka sulmuar. Kur viktima ka kundërshtuar, taksisti e ka  urdhëruar atë që të dilte nga vetura”, ka thënë Miller.

Skuadra Regjionale e Krimeve është duke i bërë hetimet. (ZMP)