Posti i drejtorit të shkollës, si duket nuk është më aq atraktiv në komunën e Mitrovicës. Këtë e tregon edhe fakti se interesimi për tu bërë drejtor i ndonjë shkolle fillore apo të mesme në komunën e Mitrovicës ishte fare i vogël me rastin e shpalljes së konkursit të fundit nga MASHT-i. 

Drejtori i Drejtorisë për Arsim në komunën e Mitrovicës, Murteza Berisha, ka bërë të ditur, se në konkursin e  hapllur për drejtorë për 14 shkolla fillore dhe të mesme në komunë, vetëm në dy sosh janë paraqitur kandidatë të mjaftueshëm, që i plotësojnë kriterët për tu thirrur në intervistim nga MASHT-i.

“Nga 14 shkolla, sa ishte shpallur konkursi për drejtorë, në 12 sosh MASHT-i do të shpall sërish konkursin për drejtorë të shkollave, për arsye se në konkursin e parë janë paraqitur vetëm nga një apo dy kandidatë, por që sipas rregullave në fuqi, nuk është e mjaftueshme, sepse për të bërë një intervistim për drejtor shkolle, në konkurs duhet të paraqiten sëpaku tre kandidatë” është shprehur Berisha.

Në konkursin e parë vetëm në shkollat fillore “Avdullah Shabani” dhe “Bislim Halimi” në Selac, janë paraqitur nga tre kandidatë për drejtor shkolle, të cilët edhe janë thirrur në intervistim nga MASHT-i dhe pritet që këto ditë të shpallen kandidatët që janë treguar më të mirë për të udhëhequr këto shkolla.

Berisha ka njoftuar poashtu, se nga MASHT-i ka kërkuar që në të ardhmen mos të jetë ky kriter  i obligueshëm për zgjedhjen e drejtorëve, sepse kjo po merr kohë të gjtaë, madje edhe nga një vit të tërë, derisa po emrohen drejtorët e shkollave, për ç’arësye dhe po ka pasoja në punën edukativo-arsimore të këtyre institucioneve të arsimit.

Sipas tij, konkursi i ri duhet të shpallet këto ditë nga MASHTI-i, që me një vendim ua ka  vazhduar kontrata drejtorëve të deritshëm deri në përfundimin e procedurave të përsitura dhe emërimin e drejtorëve të ri. (ZMP)