Të mërkurën, ka filluar faza e dytë e aksionit për largimin e të gjitha kioskave të vendosura në sheshet publike dhe trotuare të qytetit, të cilat nuk kanë leje për shfrytëzimin e pronës komunale dhe leje për zhvillimin e veprimtarisë.

Ismet Syla, drejtor i Drejtorisë së Inspekcionit në Kuvendin e Komunës, njoftoi se me marrjen e aktvendimit për largimin e kioskave, disa qytetarë kanë filluar që vet t’i largojnë ato, mirëpo tempoja e largimit të tyre ka qenë e ngadalshme, për shkak të dyshimit se a do të largohen apo jo, prandaj Kuvendit të Komunës i është imponuar marrja e vendimit për largimin e dhunshëm të të gjitha kioskave që janë të vendosura në vendet publike pa lejen e organeve kompetente.

Drejtori Syla, ka bërë të ditur se në organogramin e inspekcionit komunal janë të evidentuara 164 kioska pa leje dhe deri më tash janë larguar vullnetarisht shtatë sosh, kurse gjatë ditës së mërkurë do të largohen dymbëdhjetë të tjera, ndërkohë që aksioni do të vazhdojë deri në largimin e të gjitha kioskave që janë duke vepruar pa leje adekuate. Të gjithë pronarët e kioskave të cilët janë në asistencë socaile, Kuvendi i Komunës do t’i ndihmojë në transferimin e kioskave, ndërkaq për pronarët tjerë të cilët nuk i përgjigjen aksionit, do të hapen procedura për kundërvajtje dhe do t’i bartin të gjitha shpenzimet për largimin e kioskave.

Drejtori i Drejtorisë së Inspekcionit në Kuvendin e Komunës, Ismet Syla, i fton të gjithë pronarët e kioskave që të mos i nënshtrohen shpenzimeve të paarsyeshme dhe t’i largojnë vet ato dhe i bënë me dije se ata mund të zhvillojnë veprimtarinë e vet vetëm pas marrjes së lejes nga drejtoria gjegjëse e Kuvendit të Komunës për vendosjen e kioskës dhe për zhvillimin normal të veprimtarisë. Ai thotë se në këtë aksion nuk do të ketë lëshime për askend, prandaj pronarëve të kisokave ju mbetet që të gjykojnë vet se a dëshirojnë të pagujanë shpenzime të larta të panevojshme e të paarsyeshme, apo t’i largojnë vet kioskat dhe t’u ikin këtyre shpenzimeve.

Gjithashtu, drejtori Syla njofton se Kuvendi i Komunës ka përgatitur vendin për vendosjen e 124 kioskave të destinuara për veprimtari të ndryshme, në të cilat përfituesit do të ushtrojnë veprimtaritë e tyre.

Arsyeja e ndërmarrjes së këtij aksioni, sipas drejtorit Syla, është që më në fund të realizohet dëshira e qytetarëve të Mitrovicës, që të respektohet plani detaj urbanistik, që qyteti të ketë formën e një qyteti urban bashkëkohor, të ketë lëvizje të lirë të qytetarëve, që qyteti të ketë një pamje më dekorative dhe një ambient më të përshtatshëm e më të pastër. (ZMP)