Kryetari i Kuvendit të Komunës, Mursel Ibrahimi dhe zëvendëskryetarja Fatmire Berisha, kanë patur një takim me shefen e Zyrës Suedeze në Prishtinë, Ann – Sofie Nilsson dhe zëvendësambasadorin suedez në Beograd, Jan Lundin, me të cilët kanë biseduar për zhvillimet e fundit në komunën e Mitrovicës.

Fillimisht, kryetari Kuvendit të Komunës, Mursel Ibrahimi ka falënderuar Qeverinë Suedeze, për ndihmën që ka dhënë në zbutjen e problemeve të shumta në komunën e Mitrovicës dhe në Kosovë, për t’i njoftuar më pas mysafirët suedezë me realitetin e qytetit të Mitrovicës, që si pasojë e funksionimit të dy administratave, asaj legjitime që ka dalur nga vota e lirë e popullit dhe asaj të UNMIK-ut, por edhe funksionimit të papenguar të strukturave paralele joligjore serbe, është më specifike se ai në komunat tjera, gjë që ka penguar pushtetin lokal në kryerjen e obligimeve në tërë territorin e komunës.

Pasi që ka folur edhe për objektivat e Kuvendit të Komunës, që janë integrimi i qytetit, kthimi i qëndrueshëm dhe krijimi i kushteve për lëvizje të lirë, zhvillimi ekonomik e infrastrukturor, etj., kryetari Ibrahimi i ka njoftuar mysafirët edhe me qëndrimet e Kuvendit të Komunës dhe qytetarëve të Mitrovicës, rreth propozimit të Grupit Negociator, për krijimin e dy njësive komunale në Mitrovicë.

Kryetari Ibrahimi, u ka thënë zyrtarëve suedezë se Kuvendi i Komunës e ka përkrahur reformën e pushtetit lokal, duke kërkuar respektimin e njejtë të parimeve dhe kritereve për decentralizim në të gjitha komunat e Kosovës, në mënyrë që të të kihet për bazë qytetari e jo kriteri i etnicitetit, për të shfaqur bindjen e tij se krijimi i enklavave apo koridoreve njëetnike nuk është në të mirën e komunitetit pakicë.

Poashtu, kryetari Ibrahimi, ka thënë se qëllimi i Kuvendit të Komunës, është që në këtë proces të arrihet një zgjidhje e qëndrueshme funksionale, që do të ndikonte në përmirësimin e jetës së qytetarëve, respektimin e të drejtave të tyre dhe ofrimin në mes komuniteteve.

Ndërkaq, shefja e Zyrës Suedeze në Prishtinë, Ann – Sofie Nilsson, i ka thënë udhëheqjes komunale se gjenden në Mitrovicë për t’u njoftuar për së afërmi për zhvillimet e fundit në qytet, tash kur Mitrovica është në qendër të vëmendjes. Ajo ka shprehur gatishmërinë e Qevrisë Suedeze për të ndihmuar Kuvendin e Komunës rreth planifikimit dhe zhvillimit hapësinor, si dhe në projekte të tjera të ndryshme brenda territorit të komunës. (ZMP)