Kuvendi i Komunës, ka mbajtur të enjten mbledhje të jashtëzakonshme, me një pikë të vetme të rendit të ditës, ku është diskutuar gjendja politike dhe e sigurisë, me theks të posaçëm proceset aktuale politike në komunë.

Kryetari i Kuvendit të Komunës, Mursel Ibrahimi, fillimisht ka thënë se për shkak të funksionimit të dy administratave, pushteti lokal, nuk ka mundur t’i ushtrojë kompetencat në tërë territorin e saj.

“Objektivat e Kuvendit të Komunës janë integrimi i qytetit dhe kthimi i qëndrueshëm. Ne e përkrahim reformimin e pushtetit lokal, por duhet të respektohen parimet themelore, duhet të ruhet tërësia territoriale, të zhduken strukturat paralele, të mundësohet lëvizja e lirë e qytetarëve”, ka thënë Ibrahimi.

Ai është shprehur se Kuvendi i Komunës, është për bashkëjetesë, por jo për një reformë të pushtetit lokal që bazohet në kriterin e etnicitetit, pra duhet të respektohen parimet themelore për unifikimin e qytetit.

“Ky kuvend është në gjendje që për 24 orë t’i lirojë pronat e serbëve në jug, nëse kërkohet, duke treguar kështu vullnet të mirë për integrimin e qytetarëve”, tha Ibrahimi.

Ahmet Tmava, shef i grupit parlamentar të PDK-së, duke marrë fjalën në mbledhje ka thënë se në bazë të regjistrimit të vitit 1981 mbi 2/3 e popullësisë kanë qenë shqiptarë kurse pjesa tjetër të tjerë.

“U përgatitën skenare të ndryshme në Beograd për dezintegrimin, spastrimin etnik të pjesëve të ndryshme të Mitrovicës. U formua komuna e Zubin Potokut (i ndahet Mitrovicës) e pastaj ajo e Zveçanit. Sipas shënimeve që kanë mundur mblidhen, nga pjesa veriore të qytetit  janë dëbuar dhunshëm 2532 bashkësi familjare me afër 12 mijë banorë, duke mos llogaritur këtu fshatrat Suhadoll, Gushavc, Vinarc dhe Vidimriq”, ka thënë Tmava.

Sipas tij, gjatë luftës dhe pas saj në pjesën veriore të qytetit janë djegur mbi 500 shtëpi, kurse mbi 600 prona të tjera (shtëpi, banesa), janë okupuar nga serbët, në të cilat ata jetojnë aktualisht.

“E gjithë kjo tregon se pjesa veriore e Mitrovicës nuk është serbe, ashtu sikur nuk është edhe pjesa jugore shqiptare sepse edhe këtu ka prona dhe jetojnë familje serbe, si be fjala në Frashër familje serbe, pastaj jetojnë boshnjakët, ashkalinjtë, turqit, romët, etj. Është tjetër që serbët për qëllime dhe motive politike nuk kthehen për të jetuar në Frashër dhe pronat tjera sepse kështu dëshirojnë të tregojnë se kinse nuk kanë siguri dhe kushte për të jetuar në pjesën jugore të qytetit”, tha Tmava.

Bektesh Vidishiqi, këshilltar në Kuvendin e Komunës, tha në fillim se zgjidhja e problemeve të Mitrovicës duhet të bëhet në frymën e normalizimit të jetës në komunë. “Kuvendi i Komunës vazhdimisht ka punuar në këtë drejtim, ka bërë përpjekje që të krijojë kushte dhe të inkurajojë të gjithë qytetarët që jetojnë në komunë pa marrë parasysh përkatësinë e tyre etnike, që t’i relaskojnë raportet në mes tyre. Përkundës kësaj projektet e serbëve vazhdimisht kanë qenë të kundërta me përpjekjet e Kuvendit të Komunës. Ata kanë bërë çmos që të tensionojnë situatën dhe kanë refuzuar thirrjet për jetë të përbashkët me shqiptarët, duke  projektuar strategji të ndryshme për ndarjen e qytetit. Madje ata nuk i kanë ndalur krimet shqiptarëve as pas përfundimit të luftës”, tha Vidishiqi.

Vidishiqi ka kritikuar edhe UNMIK-un për të cilin tha se nuk është angazhuar sa duhet dhe seriozisht për integrimin e qytetit.

“Sa i përket propozimit të Ekipit Negociator për zgjidhjen e problemit të Mitrovicës, atij i mungojnë shumë të dhëna dhe se ky propozim ka shkaktuar një shqetësim të madh tek qytetarët. Nuk është në rregull që dikush të propozojë një projekt e për të të mos pyetet popullata e as udhëheqja dhe institucionet legjitime të pushtetit lokal”, tha Vidishiqi.

Ai tha se mitrovicasit nuk i kanë kontribuar ndarjes së qytetit, prandaj edhe zgjidhja e problemit të qytetit, nuk guxon të bie në kurriz të tyre, pra të shqiptarëve.

“Zgjidhja e propozuar i dëmton rëndë interesat e qytetarëve të Mitrovicës. Çdo nismë lidhur me reformimin e pushtetit lokal, duhet të ketë si qëllim ofrimin e pushtetit të të gjithë qytetarëve, por jo mbi baza të ndarjes etnike. Nuk do të duhet të lejohet që tani Mitrovica të nxirret si temë e veçantë ën bisedime sepse pastaj kompromisi do të jetë i dhembshëm”, tha ndër të tjera Bektesh Vidishiqi.

Shefi i grupit të këshilltarëve të LDK-së, në Kuvendin e Komunës, Mehdi Jonuzi, tha se këshilltarët e Kuvendit të Komunës ua kanë borxh qytetarëve që të ballafaqohen me këto sfida dhe të bëjne përpjekje për zgjidhjen e problemeve që ata i preokupojnë dhe në frymën që kërkojnë.

“Ne duhet t’ua përkujtojmë të gjithëve se qytetarët e Mitrovicës kanë dhënë kontribut të jashtëzakonshëm për të patur një Mitrovicë unike, për të patur paqe, qetësi dhe siguri. Ata në vepër kanë treguar se janë për barazi të plotë të të gjithë qytetarëve dhe komuniteteve, se janë për të jetuar secili në pronën e vet”, tha Jonuzi.

Ai në vazhdim tha se UNMIK-u ka bërë padrejtësi kur nuk i ka lejuar shqiptarët të kthehen në pronat e tyre në lagjet veriore ku kapitali i tyre atje ishte rreth 75 përçind.

“Mirëpo, pa marrë parasysh se çka ka ndodhur mendojë se qyteti duhet të integrohet dhe kjo më së miri mund të bëhet me angazhimin më të madh të UNMIK-ut, që në abshkëpunim me pushtetin lokal legjitim të realizojë projekte të ndryshme ekonomike, zhvillimore, të infrastrukturës, etj., sepse kjo është mënyra më e mirë për krijimin e kushteve për integrimin e plotë të qytetit. Qytetarët kanë treguar se kur është fjala për zgjidhjen e këtyre problemeve, që i preokupojnë njësojë pjestarët e të gjitha komuniteteve, mund të bashkëpunojnë pa asnjë problem”, tha Jonuzi.

Ndërkaq, këshilltari në Kuvendin e Komunës, Bajram Mustafa, tha se gjatë këtyre viteve Mitrovica është lënë anash pa mbështetje dhe ndihmë. “Serbët nga vise të ndryshme u koncentruan në pjesën veriore, kurse komunat tjera nuk ndihmuan sa duhet në kthimin e tyre në komunat  etyre, gjë që do të krijonte kushte për kthimin e shqiptarëve në veri. Ekipit Negociator në propozimin për Mitrovicën nuk e ka konsultuar as udjëheqjen e as Kuvendin e Komunës, por ne duhet të japim vërejtjet tona, sepse jemi përfaësues legjitim të qytetarëve”, tha Mustafa.

Administratori komunal i UNMIK-ut në Mitrovicë, Juozas Kazllas, tha, se është  befasuar me faktin që Grupi Negociator nuk ka pasur asnjë llojë bashkëpunimi me kryetarin e komunës, lidhur me projektin për Mitrovicën. Sidoqoftë ai ka mbrojtur Udhëzimin administrativ 2002/26 ,me të cilin është shpallur administrimi i pjesës veriore, e që ishte në shenjestër të shumë këshiltarëve, si strategji e ndarjës së qytetit. 

Kazllas, ju tha kuvendarëve se me këtë urdhresë adminstrative, UNMIK-u e ka marrë pushtetin jo nga Prishtina po nga Beogradi. “Në veri të Mitrovicës ka pasë progres, pasi që stafi komunal i pjesës veriore bashkëpunon me Prishtinën dhe komunën”, tha Kazllas.

Ai bëri të ditur se e ka njohtuar PSSP-në se në pjesën veriore janë mbi 500 shtëpi të djegura e rreth 850 shtëpi e banesa të uzurpuara që jetojnë serbët nga pjesët e ndryshme të Kosovës. (ZMP)