Kryetari i Kuvendit të Komunës, Mursel Ibrahimi ka patur një takim me një delegacion të romëve që jetojnë në veriun e Kosovës, kryesuar Skender Gushani, me të cilët ka biseduar për mundësitë e kthimit të romëve të zhvendosur, në lagjen e tyre në jug të qytetit.

Kryetari i Kuvendit të Komunës, Mursel Ibrahimi u ka thënë përfaqësuesve të romëve se qëllimi i Kuvendit të Komunës është që të kthehen të gjithë të zhvendosurit në pronat e tyre, përfshirë këtu edhe romët që jetojnë në veriun e Kosovës dhe gjetiu dhe që atyre t’ju krijohen kushte sa më të mira për jetë.

Kryetari Ibrahimi, i ka bërë me dije përfaqësuesit e romëve se përparësi për t’u kthyer në lagjen e romëve, do të kenë  familjet që aktualisht jetojnë në kampet në veriun e Kosovës dhe më pas ato që jetojnë jashtë Kosovës. Ai ka kërkuar nga përfaqësuesit e romëve që të mos hezitojnë, por të gjithë të kthehen në pronat e tyre, duke i siguruar ata njëkohësisht se do t’u krijohen kushte më të mira për jetë dhe se do të jenë të barabartë me të gjithë qytetarët e Mitrovicës. 

Ndërkaq, përfaqësuesit e romëve që jetojnë në veriun e Kosovës, i kanë thënë kryetarit Ibrahimi se e njohin vetëm Kuvendin e  Komunës si institucion legjitim për zgjidhjen e të gjitha problemeve të tyre, duke përfshirë këtu edhe kthimin.

Ata kryearit Ibrahimi ia kanë paraqitur disa kërkesa që kanë të bëjnë me kthimin e tyre na lagje, siç janë ndërtimi i shtëpive individuale, në vend të shtatë ndërtesave disakatëshe që janë paraparë të ndërtohen në lagje, të aranzhohet një takim me përfaqësuesit e romëve që jetojnë në vende të ndryshme të Evropës, për të diskutuar për mundësitë e kthimit të tyre, etj.

Bashkëbiseduesit u dakorduan që njëherë të fillohet me ndërtimin e dy ndërtesave në lagje, që pritet të bëhet javën e ardhshme, në mënyrë që të krijohen kushtet për kthimin e familjeve të para dhe më pas të shqyrtohen mundësitë për realizimin e kërkesave të parashtruara gjatë bisedës. (ZMP)