KUVENDI I KOMUNËS SË MITROVICËS

Nr. 01/06-09/1 dt. 20.04.2006

Mitrovicë

      Kuvendi i Komunës në mbledhjen e jashtëzakonshme të mbajtur më dt. 20.04.2006 me të vetmen pikë të rendit të ditës - Gjendja politike dhe e sigurisë në Komunë me vështrim të veçantë në proceset politike dhe detyrat e Kuvendit të Komunës në integrimin e qytetit, pas një diskutimi të gjithanshëm miraton këto:

KONKLUZIONE

1. Kuvendi i Komunës mbështetë dhe përkrah të gjitha Institucionet vendore dhe ndërkombëtare që organizimi, përkatësisht reforma e pushtetit lokal, të jetë në funksion të qytetarit pa marrë parasysh përkatësinë etnike, fetare etj.
2. Kuvendi i Komunës e mbështetë në tërësi Platformën dhe parimet themelore të shqyrtimit të çështjeve që lidhen me reformën në pushtetin lokal, Platformë kjo e përkrahur dhe miratuar në Kuvendin e Kosovës.
3. Kuvendi i Komunës ka marrë në dijeni (nga mjetet e informimit) Ofertën e Grupit Negociator për zgjidhjen e çështjes së Mitrovicës dhe me keqardhje konstaton se nuk ka pasur konsultime paraprake me udhëheqjen komunale.
4. Kuvendi i Komunës shpreh gatishmëri që të jep kontributin maksimal për gjetjen e zgjidhjeve të cilat bazohen në kriteret e dhëna më poshtë.
5. Kuvendi i Komunës do të përkrahë çdo zgjidhje e cila do ta ruaj integritetin e qytetit të Mitrovicës dhe tërësinë territoriale të Komunës në përgjithësi.
6. Për Kuvendin e Komunës së Mitrovicës është e papranueshme çdo nismë e zgjidhjeve që merr për bazë gjendjen e krijuar me gjenocid dhe spastrim etnik, gjatë dhe pas luftës.
7. Çdo forme të propozuar për reformimin e pushtetit lokal duhet t’i paraprijë kthimi i të gjithëve në pronat dhe shtëpitë e veta si dhe mundësia e posedimit me to.
8. Çdo vendim që bie ndesh me parimet e cekura më lartë është i papranueshëm për Kuvendin e Komunës dhe për qytetarët e Mitrovicës.
9. Kuvendi i Komunës konsideron se qytetarët e Mitrovicës, të përkatësisë joserbe me asgjë dhe në asnjë mënyrë nuk i kanë kontribuar krijimit të problemit të Mitrovicës, andaj edhe nuk do të lejojnë që format e zgjidhjes së problemit të bien në kurriz të tyre.
10. Kuvendi i Komunës është angazhuar dhe angazhohet për realizimin e të drejtës të të gjithë qytetarëve për t’iu qasur pronës pa kushtëzime. Në raste të shprehjes së vullnetit për kthim Kuvendi i Komunës këtë do ta mundësojë menjëherë.
11. Kuvendi i Komunës, për shkak të specifikave që i ka Mitrovica, kërkon nga organet qendrore të shtetit trajtim të veçantë për zhvillim ekonomik, të cilin e vlerëson faktor shumë të rëndësishëm për integrim të qytetit.
12. Kuvendi i Komunës merr për obligim që të krijojë kushte që për një kohë sa më të shkurtër të bëjë kthimin e të gjithë qytetarëve në pronat e veta për çka kërkon mbështetje nga të gjitha institucionet tjera relevante.

   Me këto konkluzione të njoftohet Presidenti i Kosovës, Kuvendi i Kosovës, Qeveria e Kosovës, Grupi Negociator dhe Mjetet e informimit.

Mitrovicë                                          Kryetari i Kuvendit

 2006                                                  Mr.sc. Mursel IBRAHIMI