Kryetari i Kuvendit të Komunës, Mursel Ibrahimi dhe zëvendëskryetarja Fatmire Berisha, kanë patur takim me një grup femrash, banore të pjesës veriore të qytetit, me të cilat ka biseduar për problemet me të cilat ato po ballafaqohen dhe mundësitë për të ndihmuar familjet që jetojnë në atë pjesë të qytetit.

Banoret e lagjeve veriore të qytetit, pasi që e kanë njoftuar udhëheqjen komunale me vështirësit dhe problemet e shumta, të cilat po ua rëndojnë jetën familjeve të tyre, kanë kërkuar përkrahje dhe ndihmë nga Kuvendi i Komunës, në mënyrë që të vazhdojnë të jetojnë në pronat e tyre.

Ato kanë theksuar se është e domosdoshme që Kuvendi i Komunës, por edhe institucionet tjera të vendit, të angazhohen më fuqishëm për të ndihmuar familjet që banojnë në veri të qytetit, duke gjetur mundësi dhe mjete për sigurimin e gjërave elementare për jetë, mbulimin e shpenzimeve të qirasë, rrymës, etj., duke shprehur njëkohësisht gatishmërinë e tyre që edhe mëtutje të vazhdojnë të qëndrojnë dhe jetojnë në shtëpitë e tyre, në lagjet veriore.

Kryetari i Kuvendit të Komunës, Mursel Ibrahimi, i ka njoftuar banoret e veriut të Mitrovicës, me zhvillimet e fundit në komunë, duke thënë se Kuvendi i Komunës, ka miratuar disa konkluza, me anë të të cilave ka kërkuar nga institucionet më të larta të vendit që të mirren më shumë parasysh problemet me të cilat po ballafaqohen qytetarët e Mitrovicës dhe që të mos bëhet decentralizimi, pa u kthyer të gjithë qytetarët e zhvendosuri në pronat e tyre, kudo qofshin ato, që të krijohen kushte edhe më të mira për lëvzije dhe qarkullim të lirë, etj.

Poashtu, kryetari Ibrahimi u ka thënë banoreve të veriut të Mitrovicës se Kuvendi i Komunës, do të shiqoj të gjitha mundësitë për t’i ndihmuar ato, megjithë mundësitë e vogla buxhetore që ka komuna, por duke shtuar se do të kërkojë ndihmë edhe nga institcionet më të larta të vendit, në mënyrë që familjeve që jetojnë në veri të qytetit, t’iu bëhet e mundur qëndrimi në pronat e tyre dhe që  atje të kenë një jetë sadopak normale e të pabrenga, gjë e cila do të ndikonte që të mos ketë zhvendosje për në pjesën jugore të qytetit. (ZMP)