Njëra ndër figurat më të ndritshme të UÇK-së, luftëtari i patrembur i Birgadës “141 Mehë Uka”, të Zonës Operative të Shalës së Bajgorës në komunën e Mitrovicës, komandanti i Njësitit Special, Shemsi Ahmeti, komandant Shemi, është përkujuar në mënyrë dinitoze në shtatëvjetorin e rënjës, në fshatin e tij të lindjes Kodër (Zasellë), në prani të bashkëluftëtarëve të tij dhe qindra qytetarëve të komunës, rajonit e të vendit, në mesin e të cilëve ishin edhe kryetari i Kuvendit të Komunës së Mitrovicës, Mursel Ibrahimi me bashkëpunëtorë, zëvendësministri në Qeverinë e Kosovës, Nazmi Fejza, komandanti i Zonës së IV-të të TMK-së, gjenerali Zymber Halimi, gjenerali Rustem Mustafa-Remi, luftëtarë nga Dukagjini, përfaqësues të shoatave të dalura nga Lufta e tj. Duke folur në emër të fshatit, dr Rizah Musliu, ka thënë se komandant Shemi kohës iu përgjegjë në momentin më të duhur dhe në mënyrën më të denjë, duke ju kundërvu robërisë shekullore me armë në dorë, me guximin, trimërinë dhe diturinë luftarake.

“Lufta për liri dhe identitet kombëtarë shiquar në konotacion kohor, ka forma të veprimit dhe të sakrificës, por lufta e UÇK-së, është sublimim i të gjitha formave ku mbërthen në veti individi me guxim të lartë, me ideal kombëtarë dhe me sakrificën e çdo gjëje gjerë në realizimin e atij qëllimi – ideali duke e flijuar edhe jetën. I tillë ishte komandant Shemi dhe dëshmorët e tjerë. Atyre u takon piedestali më i lartë – Lavdia, sepse vetëm ata të cilët kalojnë nëpër këtë sfidë të jetës, kanë një emër një ditëlindje, kalojnë në pavdekshmëri, përgjithmonë e kanë Lavdinë”, ka thënë ndër të tjera Musliu.

Kryetari i Kuvendit të Komunës së Mitrovicës, Mursel Ibrahimi, komandant Shemin e ka cilësuar si njërin ndër komandantët më të mirë të UÇK-së në luftën e sukseshme për çlirimin nga pushtuesi. “Komandant Shemi, me rënjen e tij heroike, ka bërë që të jetojë gjithmonë në zemrat tona dhe në zemrat e gjeneratave që do të vijnë pas nesh. Duke përkujtuar se Komandant Shemi ishte një figurë komplete që e karakterizonin mbi të gjitha profesionalizmi, modestia dhe trimëria, dua të them se organet e pushtetit lokal, do të bëjnë çmos për t’i nderuar e respektuar dëshmorët e kombit dhe për të krijuar kushte që në mënyrë institucionale të bëhet përkujdesja për familjet e tyre dhe për invalidët e veteranët e luftës”, është shprehur kryetari Mursel Ibrahimi.

Ndërkaq, bashkëluftëtari i komandant Shemit, majori Miftar Kurti, ka thënë fillimisht se janë të rrallë ata ushtarak, si komandant Shemsi Ahmeti, që e shoqëruan me aq besnikëri fjalën me vepër, që dinë çfarë duan, që din kur dhe si të veprojnë.

“Me inkuadrimin e komandant Shemsi Ahmetit në radhët e UÇK-së në Shalë, u hetua ndikimi i tij si në rrafshin psikofizik ashtu edhe në atë profesional. Guximi, përkushtimi, profesionalizimi, afria me bashkëluftëtarët, gjakëftohtësia e tij bëri që në shumë beteja armiku të tërhiqet i zhgënyer, i thyer, i dërmuar dhe i përgjakur. Dhe në Zonën Operative të Shalës nuk janë të pakta betejat kundër armikut në të cilat mori pjesë ky tribun popullor. Kudo në aksione, beteja, luftime të cilat u zhvilluan në Trepçali, Mazhiq, Kutllovc, melenicë, Preten, Cenaj dhe Majdan u dëshmua. Si ishte figurë e përmasave kombëtare, flasin betejat nëpër të cilat mori pjesë, flet profesionalizimi i tij, flet ndikimi që pati ai me shokë në UÇK”, ka spikatur major Kurti.

Eprori i lartë i TMK-së, majori Kurti tha komandant Shemi ishte një nga shembujt e heroizmit shaljan, i cili me aktin e flijimit të tij në Kodrën e Majdanit, më 26 prill 1999, së bashku me Arsim Muzaqin, Rrustem Hysenin, Ahmet e Xhemail Haxhën dhe Asllan Cimilin, dëshmoi edhe një herë se Shala ka pasur dhe ka burra, dëshmoi se kjo tokë ka lindur e rritur trima që i dalin krah atdheut atëherë kur ai e kërkon këtë.

“Dhe nuk është e rastit pse emri i komandant Shemit është këtu, nuk është e rastit pse emrin e tij e mbanë “Batalioni i 14 Gardist” dhe nhuk është e rastit gjithashtu, pse me këtë emër takohemi në rrugë, sheshe, në libra të historisë, përmbledhje poezish, në këngë e ku jo tjetër”, ka thënë majori Miftar Kurti.

Në emër të shoqatave të dalura nga lufta e UÇK-së, për veprën e dëshmorit Shemsi Ahmeti, ka folur bashkëluftëtari i tij, Rizah hairi, kryetar i Shoqatës së Veteranëve të Luftës të UÇK-së. “Sa herë shënojmë përvjetorët e rënies së dëshmorëve, fryma e tyre është në mesin tonë. Jetojnë e frymojnë me ne. Këtu në vendlindjen e komandant Shemit, ndiejmë erën e lirisë, por fatkeqësisht betimi dhe amaneti i dëshmorëve akoma nuk u realizua. Akoma, nëpër Kosovën e martirizuar lëvizin kriminelët që shkaktuan gjithë atë dhunë e gjakderdhje, gjithë atë eksod, shkatërrim e djegie”ka thënë ndër të tjera Rizah Haziri. (ZMP)