Të enjtën, më 4 maj 2006, në Qendrën e Kulturës “Rexhep Mitrovica”, në qytetin buzë Ibrit, do të fillojë Festivali i Dramës së Fëmijëve, i cili do të zgjasë dy ditë, ku do të garojnë gjashtë grupe teatrore të shkollave fillore të Mitrovicës.

Në ditën e parë, do të garojnë shkolla fillore “Ismail Qemajli” me dramën “Lypësi Memec”; shkolla fillore “Avdullah Shabani”, me dramën “Buzëqeshja” dhe shkolla fillore “Skenderbeu”, me dramën “Lulet e lirisë”. Ndërkaq, në ditën e dytë, më 5 maj 2006, do të garojnë garojnë: shkolla fillore “Isuf Rexha”, me dramën “Macja kureshtare”; shkolla fillore “Nonda Bulka”, me dramën “Mosha e Bardhë” dhe shkolla fillore “Migjeni”, me dramën “Hirushja”.

Festivalin do ta përcjellë juria profesionale në prbërje Selman Jusufi, aktor i Teatrit Kombëtar  në Prishtinë, Agim Selimi, regjisor i Teatrit Kombëtarë në Prishtinë dhe Çamëri Ceraja, aktore shumëvjeçare e Teatrit të Qytetit “Sandër Prosi” në Mitrovicë.

Edhe në këtë festival është parapa që ë ndahen edhe këto çmimet për vendin e  parë, vendin e dytë, vendin e tretë, rolin më të mirë  të realizuar të femrës, rolin më të mirë të realizuar të mashkullit dhe çmimin për regjinë më të mirë. Shkolla, përkatëisht grupi teatror i cili do të shpërblehet me vendin e parë, do t’i përfaqësojë shkollat e Mitrovicës në Festivalin Regjional të Dramës së Fëmijëve, i cili mbahet më 13, 14 dhe 15 qershor 2005 në Skenderaj.

Festivalin e financon Kuvendi i Komunës, përkatësisht Drejtoria për Kulturë, Rini dhe Sport. (ZMP)