Kryetari i Kuvendit të Komunës, Mursel Ibrahimi dhe zëvendëskryetarja Fatmire Berisha, kanë patur një takim me një grup përfaqësuesish shqiptarë dhe serbë të fshatit Frashër, kryesuar nga Rrahman Hasani dhe Vojisllav Joviq, me të cilët kanë biseduar për zgjidhjen e disa problemeve me të cilat po ballafaqohen banorët e këtij fshati.

Përfaqësuesit e banorëve të fshatit Frashër, kanë kërkuar nga udhëheqja komunale që t’i ndihmojë për rregullimin e infrastrukturës në fshat, duke paraqitur si prioritet ndërtimin e rrugës që lidh lagjet brenda fshatit, në një gjatësi prej një kilometri e gjysmë, e cila siç thanë ata është dëmtuar shumë dhe në kushte të përkeqësuara atmosferike bëhet plotësisht e pakalueshme.

Përfaqësuesit e fshatit Frashër, i thanë udhëheqjes komunale se poqëse realizohet projekti i rregullimit të infrastrukturës, atëherë janë disa biznesmenë që kanë shprehur gatishmërinë për të ndërtuar aty një fabrikë të prodhimeve vendore, në të cilin do të punësoheshin mbi 100 të rinjë nga radhët e të dyja komuniteteve.

Në bisedë me udhëheqjen komunale, përfaqësuesit e Frashërit shtruan edhe kërkesën për t’i ndihmuar disa familje me gjendje të rëndë ekonomike në realizimin e të mbjellave pranverore.

Kryetari i Kuvendit të Komunës, Mursel Ibrahimi, i ka thënë përfaqësuesve të banorëve të fshatit Frashër se udhëheqja komunale do të bëjë përpjekje për gjetjen e mundësive për t’i realizuar kërkesat e tyre, duke i inkurajuar dhe kërkuar njëkohësisht nga ata që të bashkëpunojnë në mes vete dhe që raportet ndërfqinjësore t’i relaksojnë vazhdimisht. (ZMP)