Me pjesëmarrjen e rreth 500 artdashësve të rinj, të enjtën Në Qendrën e Kulturës “Rexhep Mitrovica” në Mitrovicë, ka filluar Festivali i Dramës së Fëmijëve, i cili do të zgjasë dy ditë, ku do të garojnë gjashtë grupe teatrore të shkollave fillore të Mitrovicës. 

Festivalin e shpalli të hapur shefi i Sektorit për Kulturë të Kuvendit të Komunës së Mitrovicës, Sabit Idrizi, i cili duke i përshëndetur të pranishmit dhe sidomos trupat pjesëmarrëse në garim, shprehu bindjen e tij se vetëm në këtë mënyrë dhe me punë të përbashkët, mund të bëhen punë të mira dhe të ndershme të kulturës. “Sot e nesër jemi këtu së bashku, në këtë fidanishte të kulturës, nga e cila shpresojmë të dalin aktore e aktorë të mëdhenjë. Në emër të kësaj shprese grupeve dramatike të shkollave pjesëmarrëse në festival u dëshirojë suksese e punë të mbarë”, tha ndër të tjera Idrizi.

Kuvendi i Komunës, përkatësisht Drejtoria për Kulturë, Rini dhe Sport, organzimin e Festivalit të sivjem të Dramës së Fëmijëve, ia ka besuar Teatrit të qytetit “Sandër Prosi”, i cili kishte treguar angazhim dhe përkushtim maksimal për realizimin e kësaj ngjarjeje të rëndësishme kulturore.

Në ditën e parë të festivalit u paraqitën nxënësit e shkollës fillore “Ismail Qemajli” me dramën “Lypësi Memec”,  të “Avdullah Shabanit” me dramën “Buzëqeshja”dhe nxënësit e  shkollës fillore “Skenderbeu” me dramën “Lulet e lirisë.

Drama “Lypësi Memec”, e autorit Zymber Kelmendi në regji të Hatixhe Mulliqit e skenografi të Dren Malajt, zgjoi interesim të madh tek shikuesit e vegjël që kishin mbushur përplotë sallën. Tema e trajtuar në këtë dramë ishte dukuria negative dhe e shëmtuar e angazhimit të fëmijëve në punë dhe aktivitete tjera negative për përfitime materiale, ndërkohë që prindërit jetojnë në kurriz të tyre e madje duke i keqpërdorë në mënyrën më vulgare mjetet e krijuara nga fëmijët  e tyre. Rolin e fëmiut që nga prindi i tij detyrohet të punojë dhe lyp, me shumë sukses e luajti Fisnik Zeneli. U dalluan edhe Agnesa Leku e Egzon Meha në rolin e prindërve.

Juria profesionale e përbërë nga Selman Jusufi, aktor i Teatrit Kombëtar në Prishtinë, Agim Selimi, regjisor i Teatrit Kombëtarë në Prishtinë dhe Çamëri Ceraja, aktore shumëvjeçare e Teatrit të Qytetit “Sandër Prosi” në Mitrovicë, i përcolli me vëmendje shfaqjet e ditës së parë të festivalit, ndërkohë që festivali do të vazhdojë edhe të premtën, ku do të garojnë shkolla fillore “Isuf Rexha” me dramën “Macja kureshtare”, “Nonda Bulka” me dramën “Mosha e Bardhë” dhe shkolla fillore “Migjeni” me dramën “Hirushja”.

Shkolla, përkatësisht grupi teatror i cili do të shpërblehet me vendin e parë, do t’i përfaqësojë shkollat e Mitrovicës në Festivalin Regjional të Dramës së Fëmijëve, i cili mbahet më 13, 14 dhe 15 qershor 2005 në Skenderaj. (ZMP)